ਅਸਤੀਫੇ ਤੋਂ ਬਾਅਦ ਸੇਖਵਾਂ ਨੇ ਸੁਖਬੀਰ ਤੇ ਮਜੀਠੀਆ ‘ਤੇ ਕੱਢੀ ਭੜਾਸ

ਅੰਮ੍ਰਿਤਸਰ : ਟਕਸਾਲੀ ਆਗੂ ਸੇਵਾ ਸਿੰਘ ਸੇਖਵਾਂ ਨੇ ਅਸਤੀਫਾ ਦੇਣ ਤੋਂ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਤੇ ਮਜੀਠੀਆ ਖਿਲਾਫ ਰੱਜ ਕੇ ਭੜਾਸ ਕੱਢੀ। ਪੱਤਰਕਾਰ ਨਾਲ ਗੱਲਬਾਤ ਕਰਦਿਆਂ ਸੇਖਵਾਂ ਨੇ ਜੋ ਸ਼ਬਦਾਵਲੀ ਵਰਤੀ ਹੈ ਉਹ ਸ਼ਾਇਦ ਹੀ ਕਿਸੇ ਅਕਾਲੀ ਲੀਡਰ ਨੇ ਆਪਣੀ ਪਾਰਟੀ ਦੇ ਪ੍ਰਧਾਨ ਲਈ ਵਰਤੀ ਹੋਵੇ। ਸੇਖਵਾਂ ਨੇ ਸੁਖਬੀਰ ਬਾਦਲ ਖਿਲਾਫ ਬੋਲਦਿਆਂ ਕਿਹਾ ਕਿ ਜੇਕਰ ਉਹ ਅਕਾਲੀ ਦਲ ਦਾ ਪ੍ਰਧਾਨ ਨਾ ਹੁੰਦਾ ਤਾਂ ਪਾਰਟੀ ਦਾ ਬੇੜਾ ਗਰਕ ਨਹੀਂ ਸੀ ਹੋਣਾ। ਜੇਕਰ ਉਸ ਨੇ ਠੀਕ ਤਰ੍ਹਾਂ ਕੰਮ ਕੀਤੇ ਹੁੰਦੇ ਤਾਂ ਅੱਜ ਪਾਰਟੀ ਸਿਰਫ 15 ਸੀਟਾਂ ‘ਤੇ ਹੀ ਨਹੀਂ ਸੀ ਰਹਿ ਜਾਣੀ। ਅੱਜ ਜੋ ਹਲਾਤ ਸ਼੍ਰੋਮਣੀ ਕਮੇਟੀ ਦੇ ਬਣੇ ਹਨ ਉਨ੍ਹਾਂ ਦਾ ਕਾਰਨ ਵੀ ਸੁਖਬੀਰ ਬਾਦਲ ਹੀ ਹੈ। ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਇਕੋਂ ਪਰਿਵਾਰ ਦਾ ਨਹੀਂ ਹੈ। ਇਸ ਦੌਰਾਨ ਸੇਖਵਾਂ ਨੇ ਮਜੀਠੀਆ ਖਿਲਾਫ ਬੋਲਦਿਆਂ ਕਿਹਾ ਕਿ ਮਾਝੇ ਦਾ ਬੇੜਾ ਗਰਕ ਉਸ ਨੇ ਕੀਤਾ ਹੈ। ਮਜੀਠੀਆ ਬਾਦਲਾਂ ਦਾ ਨਜ਼ਦੀਕੀ ਰਿਸ਼ਤੇਦਾਰ ਹੈ ਉਸ ‘ਚ ਹੋਰ ਕੋਈ ਹੁਨਰ ਨਹੀਂ ਹੈ।