ਆਸਟਰੇਲੀਆ: ਭਾਰਤੀ ਮੂਲ ਦੇ ਵਿਅਕਤੀ ਵੱਲੋਂ ਆਪਣੀ ਪਤਨੀ ਤੇ ਬੱਚੀ ਦਾ ਕਤਲ

ਮੈਲਬੋਰਨ (PE)- ਬੀਤੇ ਵੀਰਵਾਰ ਨੂੰ ਮੈਲਬੌਰਨ ਦੇ ਮਿੱਲ ਪਾਰਕ ਇਲਾਕੇ ਵਿਚ ਭਾਰਤੀ ਮੂਲ ਦੇ ਵਿਅਕਤੀ ਪ੍ਰਬਲ ਰਾਜ ਸ਼ਰਮਾ ਵੱਲੋਂ  ਆਪਣੀ ਪਤਨੀ ਪੂਨਮ ਸ਼ਰਮਾ ਅਤੇ 6 ਸਾਲਾ ਬੱਚੀ ਵਨੀਸਾ ਦੇ ਕਤਲ ਕਰਨ ਦਾ ਦਰਦਨਾਕ ਮਾਮਲਾ ਸਾਹਮਣੇ ਆਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਪ੍ਰਬਲ ਰਾਜ ਸ਼ਰਮਾ (40) ਵੱਲੋਂ ਘਰੇਲੂ ਹਿੰਸਾ ਦੇ ਚਲਦਿਆਂ ਆਪਣੀ ਪਤਨੀ ਪੂਨਮ ਸ਼ਰਮਾ (39) ਅਤੇ 6 ਸਾਲਾ ਬੱਚੀ ਵਨੀਸਾ ‘ਤੇ ਘਰ ਵਿਚ ਹੀ ਚਾਕੂ ਨਾਲ ਹਮਲਾ ਕੀਤਾ ਗਿਆ। ਇਸ ਹਮਲੇ ਦੌਰਾਨ ਪ੍ਰਬਲ ਸ਼ਰਮਾ ਦੀ 10 ਸਾਲਾ ਬੱਚੀ ਐਂਜਲਾ ਚਮਤਕਾਰੀ ਢੰਗ ਨਾਲ ਮੌਕੇ ਤੋਂ ਭੱਜਣ ਵਿਚ ਕਾਮਯਾਬ ਹੋ ਗਈ। ਇਸ ਹਮਲੇ ਵਿਚ ਪੂਨਮ ਸ਼ਰਮਾ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਸੀ ਅਤੇ ਜ਼ਖ਼ਮੀ 6 ਸਾਲਾ ਬੱਚੀ ਵਨੀਸਾ ਨੂੰ ਹਸਪਤਾਲ ਲਿਜਾਇਆ ਗਿਆ ਪਰ ਸ਼ੁੱਕਰਵਾਰ ਸਵੇਰੇ ਉਸ ਦੀ ਵੀ ਮੌਤ ਹੋ ਗਈ।ਦੋਸ਼ੀ ਪ੍ਰਬਲ ਰਾਜ ਸ਼ਰਮਾ ਨੂੰ ਪੁਲਸ ਪਹਿਰੇ ਹੇਠ ਗੰਭੀਰ ਹਾਲਤ ਵਿਚ ਹਸਪਤਾਲ ਲਿਜਾਇਆ ਗਿਆ ਹੈ।