ਉੱਤਰਾਖੰਡ: ਸਹਸਤ੍ਰਧਾਰਾ ’ਚ ਸੈਲਫੀ ਲੈਂਦੇ ਸਮੇਂ ਨਦੀ ’ਚ ਡਿੱਗੀ ਐੱਮਬੀਬੀਐੱਸ ਵਿਦਿਆਰਥਣ ਦੀ ਮੌਤ

ਦੇਹਰਾਦੂਨ, 7 ਅਗਸਤ- ਦੇਹਰਾਦੂਨ ਦੇ ਮਸ਼ਹੂਰ ਸਹਸਤ੍ਰਧਾਰਾ ਵਿੱਚ ਨਹਾਉਂਦਿਆਂ ਸੈਲਫੀ ਲੈਂਦੇ ਸਮੇਂ ਮੈਡੀਕਲ ਵਿਦਿਆਰਥਣ ਦੀ ਨਦੀ ‘ਚ ਡਿਗਣ ਕਾਰਨ ਮੌਤ ਹੋ ਗਈ। ਉੱਤਰ ਪ੍ਰਦੇਸ਼ ਦੇ ਮੁਰਾਦਾਬਾਦ ਦੇ ਮੈਡੀਕਲ ਕਾਲਜ ਵਿੱਚ ਐੱਮਬੀਬੀਐਸ ਦੇ ਪਹਿਲੇ ਸਾਲ ਦੀ ਵਿਦਿਆਰਥਣ ਸਵਾਤੀ ਜੈਨ (20) ਐਤਵਾਰ ਨੂੰ ਆਪਣੇ ਦੋਸਤ ਨਾਲ ਸਹਸਤ੍ਰਧਾਰਾ ਗਈ ਸੀ। ਦੋਵੇਂ ਸਹਸਤ੍ਰਧਾਰਾ ਵਿੱਚ ਉੱਪਰ ਗਏ ਅਤੇ ਨਹਾਉਣ ਲੱਗੇ। ਇਸੇ ਦੌਰਾਨ ਸਵਾਤੀ ਪੱਥਰ ਉੱਤੇ ਚੜ੍ਹ ਗਈ ਅਤੇ ਆਪਣੇ ਮੋਬਾਈਲ ਫੋਨ ਨਾਲ ਸੈਲਫੀ ਲੈਣ ਲੱਗੀ। ਸੈਲਫੀ ਲੈਂਦੇ ਸਮੇਂ ਉਸ ਦਾ ਪੈਰ ਫਿਸਲ ਗਿਆ ਅਤੇ ਉਹ ਸਿੱਧੀ ਨਦੀ ਵਿੱਚ ਡਿੱਗੀ। ਬਰਸਾਤ ਕਾਰਨ ਨਦੀ ਦਾ ਵਹਾਅ ਤੇਜ ਸੀ ਜਿਸ ਕਾਰਨ ਸਵਾਤੀ ਨੂੰ ਰੁੜ੍ਹਦੀ ਦੇਖ ਉਸ ਦੇ ਦੋਸਤਾਂ ਅਤੇ ਹੋਰਨਾਂ ਨੇ ਰੌਲਾ ਪਾਇਆ। ਪੁਲੀਸ ਅਤੇ ਸਟੇਟ ਡਿਜ਼ਾਸਟਰ ਰਿਸਪਾਂਸ ਫੋਰਸ (ਐੱਸਡੀਆਰਐੱਫ) ਟੀਮ ਨੇ ਨਦੀ ‘ਚ ਬਚਾਅ ਮੁਹਿੰਮ ਚਲਾਈ ਅਤੇ ਘਟਨਾ ਸਥਾਨ ਤੋਂ ਕਰੀਬ ਦੋ ਕਿਲੋਮੀਟਰ ਦੂਰ ਬੇਹੋਸ਼ੀ ਦੀ ਹਾਲਤ ‘ਚ ਉਸ ਨੂੰ ਰੱਸੀਆਂ ਦੀ ਮਦਦ ਨਾਲ ਬਾਹਰ ਕੱਢਿਆ। ਸਵਾਤੀ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।