ਕੇਜਰੀਵਾਲ ਨਾਲ ਗੱਲ ਨਹੀਂ ਬਣੀ ਤਾਂ ਰਾਜੇਵਾਲ ਪਾਣੀਆਂ ਦੇ ਦੋਸ਼ ਲਾਉਣ ਲੱਗੇ: ਭਗਵੰਤ ਮਾਨ

ਲੰਬੀ 7 ਫਰਵਰੀ-ਆਮ ਆਦਮੀ ਪਾਰਟੀ ਦੇ ਮੁੱਖ ਮੰਤਰੀ ਅਹੁਦੇ ਦੇ ਉਮੀਦਵਾਰ ਭਗਵੰਤ ਮਾਨ ਨੇ ਅੱਜ ਲੰਬੀ ਹਲਕੇ ਵਿੱਚ ਪਾਰਟੀ ਉਮੀਦਵਾਰ ਗੁਰਮੀਤ ਸਿੰਘ ਖੁੱਡੀਆਂ ਦੀ ਹਮਾਇਤ ’ਚ ਚੋਣ ਪ੍ਰਚਾਰ ਕੀਤਾ। ਇਸ ਮੌਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਭਗਵੰਤ ਮਾਨ ਨੇ ਸੰਯੁਕਤ ਸਮਾਜ ਮੋਰਚਾ ਦੇ ਮੁਖੀ ਬਲਵੀਰ ਸਿੰਘ ਰਾਜੇਵਾਲ ਵੱਲੋਂ ਅਰਵਿੰਦ ਕੇਜਰੀਵਾਲ ‘ਤੇ ਸਤਲੁਜ-ਯਮੁਨਾ ਲਿੰਕ ਨਹਿਰ ਦਾ ਪਾਣੀ ਦਿੱਲੀ ਲਿਜਾਣ ਦੀਆਂ ਕੋਸ਼ਿਸ਼ਾਂ ਦੇ ਦੋਸ਼ਾਂ ਬਾਰੇ ਆਖਿਆ ਕਿ ਰਾਜੇਵਾਲ ਪਹਿਲਾਂ ਖੁਦ ਕੇਜਰੀਵਾਲ ਨਾਲ ਮੁਲਾਕਾਤਾਂ ਕਰਦੇ ਰਹੇ, ਗੱਲ ਨਾ ਬਣਨ ‘ਤੇ ਹੁਣ ਬੇਤੁੱਕੇ ਦੋਸ਼ ਲਗਾਉਣ ਲੱਗ ਪਏ ਹਨ। ਉਹ ਰਾਜੇਵਾਲ ਨੂੰ “ਆਲ ਦ ਬੈਸਟ” ਆਖਦੇ ਹਨ। ਇਸ ਮੌਕੇ ਆਪ ਵਰਕਰਾਂ ਦਾ ਵੱਡਾ ਜਮਾਵੜਾ ਵੇਖਣ ਨੂੰ ਮਿਲਿਆ। ਚੋਣ ਕਮਿਸ਼ਨ ਦੇ ਕੋਵਿਡ ਨਿਯਮਾਂ ਦੀ ਧੱਜੀਆਂ ਖੁੱਲ੍ਹੇਆਮ ਉੱਡਦੀਆਂ ਵੇਖੀਆਂ ਗਈਆਂ। ਤਿੰਨ ਕੋਨੀ ਭਰਵੇਂ ਇਕੱਠ ਕਾਰਨ ਗਿੱਦੜਬਾਹਾ ਸੜਕ ਕਰੀਬ ਡੇਢ ਘੰਟਾ ਤੱਕ ਬੰਦ ਰਹੀ।