ਕੋਟਾ ’ਚ ਇਕ ਹੋਰ ਖ਼ੁਦਕੁਸ਼ੀ: ਜੇਈਈ ਦੀ ਤਿਆਰ ਕਰ ਰਹੀ 18 ਸਾਲਾ ਲੜਕੀ ਨੇ ਫਾਹਾ ਲਿਆ

ਕੋਟਾ (ਰਾਜਸਥਾਨ), 29 ਜਨਵਰੀ- ਇਥੇ ਜੇਈਈ ਦੀ ਤਿਆਰੀ ਕਰ ਰਹੀ 18 ਸਾਲਾ ਵਿਦਿਆਰਥਣ ਨੇ ਅੱਜ ਆਪਣੇ ਘਰ ਵਿੱਚ ਕਥਿਤ ਤੌਰ ‘ਤੇ ਫਾਹਾ ਲੈ ਲਿਆ। ਉਸ ਨੇ ਆਪਣੇ ਮਾਤਾ-ਪਿਤਾ ਤੋਂ ਮੁਆਫੀ ਮੰਗਣ ਅਤੇ ਆਪਣੇ ਆਪ ਨੂੰ ਹਾਰਨ ਵਾਲੀ ਕਰਾਰ ਦਿੰਦਾ ਖੁ਼ਦਕੁਸ਼ੀ ਨੋਟ ਵੀ ਛੱਡਿਆ ਹੈ। ਨਿਹਾਰਿਕਾ ਸਿੰਘ ਦੀ ਮੌਤ ਇਸ ਸਾਲ ਖੁ਼ਦਕੁਸ਼ੀ ਕਰਨ ਦਾ ਦੂਜਾ ਮਾਮਲਾ ਹੈ। ਖੁਦਕੁਸ਼ੀ ਦੀ ਖ਼ਬਰ ਉਸ ਦਿਨ ਆਈ ਜਦੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਆਪਣੇ ਸਕੂਲ ਬੋਰਡ ਦੀਆਂ ਪ੍ਰੀਖਿਆਵਾਂ ਦੀ ਤਿਆਰੀ ਕਰ ਰਹੇ ਵਿਦਿਆਰਥੀਆਂ ਨਾਲ ਆਪਣੀ ਸਾਲਾਨਾ ਗੱਲਬਾਤ ਪਰੀਕਸ਼ਾ ਪੇ ਚਰਚਾ ਕਰ ਰਹੇ ਸਨ। ਪੁਲੀਸ ਮੁਤਾਬਕ ਨਿਹਾਰਿਕਾ ਸ਼ਹਿਰ ਦੇ ਬੋਰਖੇੜਾ ਥਾਣਾ ਖੇਤਰ ਵਿੱਚ ਸ਼ਿਵ ਵਿਹਾਰ ਕਲੋਨੀ ਵਿੱਚ ਆਪਣੇ ਪਰਿਵਾਰਕ ਘਰ ਰਹਿੰਦੀ ਸੀ ਅਤੇ 30 ਜਾਂ 31 ਜਨਵਰੀ ਨੂੰ ਉਸ ਦਾ ਜੇਈਈ ਟੈਸਟ ਦੇਣਾ ਸੀ। ਉਹ ਤਿੰਨ ਭੈਣਾਂ ਵਿੱਚੋਂ ਸਭ ਤੋਂ ਵੱਡੀ ਸੀ। ਉਸ ਦੇ ਪਿਤਾ ਕੋਟਾ ਵਿੱਚ ਨਿੱਜੀ ਬੈਂਕ ਵਿੱਚ ਸੁਰੱਖਿਆ ਗਾਰਡ ਹਨ। ਬੀਤੇ ਸਾਲ ਇਸ ਸ਼ਹਿਰ ’ਚ 26 ਵਿਦਿਆਰਥੀਆਂ ਨੇ  ਖੁ਼ਦਕੁਸ਼ੀ ਕੀਤੀ ਸੀ।