ਟਮਾਟਰ ਦਾ ਭਰਿਆ ਟਰੱਕ ਹਾਈਜੈਕ ਕਰਨ ਵਾਲੇ ਪਤੀ-ਪਤਨੀ ਗ੍ਰਿਫ਼ਤਾਰ

ਬੰਗਲੂਰੂ, 23 ਜੁਲਾਈ- ਤਾਮਿਲਨਾਡੂ ਵਿੱਚ ਪਤੀ-ਪਤਨੀ ਨੂੰ ਬੰਗਲੂਰੂ ਵਿੱਚ ਢਾਈ ਟਨ ਟਮਾਟਰ ਨਾਲ ਲੱਦੇ ਟਰੱਕ ਨੂੰ ਹਾਈਜੈਕ ਕਰਨ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲੀਸ ਮੁਤਾਬਕ, ਵੈਲੋਰ ਵਾਸੀ ਇਹ ਜੋੜਾ ਸ਼ਾਹਰਾਹਾਂ ’ਤੇ ਲੁੱਟ-ਖੋਹ ਕਰਨ ਵਾਲੇ ਇੱਕ ਗਰੋਹ ਦਾ ਮੈਂਬਰ ਹੈ। ਦੋਵਾਂ ਨੇ ਅੱਠ ਜੁਲਾਈ ਨੂੰ ਚਿਤਰਦੁਰਗ ਜ਼ਿਲ੍ਹੇ ਦੇ ਚਿੱਕਾਜਾਲਾ ਵਿੱਚ ਹਿਰੀਪੁਰ ਦੇ ਇੱਕ ਕਿਸਾਨ ਮੱਲੇਸ਼ ਨੂੰ ਰੋਕਿਆ। ਇਹ ਦਾਅਵਾ ਕਰਦਿਆਂ ਉਸ ਤੋਂ ਪੈਸੇ ਠੱਗਣ ਦੀ ਕੋਸ਼ਿਸ਼ ਕੀਤੀ ਕਿ ਉਸ ਦੇ ਟਰੱਕ ਨੇ ਉਨ੍ਹਾਂ ਦੀ ਕਾਰ ਨੂੰ ਟੱਕਰ ਮਾਰੀ ਹੈ। ਪੁਲੀਸ ਮੁਤਾਬਕ, ਜਦੋਂ ਮੱਲੇਸ਼ ਨੇ ਪੈਸੇ ਦੇਣ ਤੋਂ ਇਨਕਾਰ ਕੀਤਾ ਤਾਂ ਜੋੜੇ ਨੇ ਉਸ ਦੀ ਕੁੱਟਮਾਰ ਕੀਤੀ ਅਤੇ ਢਾਈ ਲੱਖ ਰੁਪਏ ਤੋਂ ਵੱਧ ਕੀਮਤ ਦੇ ਢਾਈ ਟਨ ਟਮਾਟਰ ਨਾਲ ਲੱਦੇ ਟਰੱਕ ਨੂੰ ਲੈ ਕੇ ਫਰਾਰ ਹੋ ਗਏ। ਪੁਲੀਸ ਨੇ ਦੱਸਿਆ ਕਿ ਕਿਸਾਨ ਦੀ ਸ਼ਿਕਾਇਤ ’ਤੇ ਆਰਐੱਮਸੀ ਯਾਰਡ ਪੁਲੀਸ ਨੇ ਗਰੋਹ ਦਾ ਪਤਾ ਲਾਇਆ ਅਤੇ ਸ਼ਨਿੱਚਰਵਾਰ ਨੂੰ ਭਾਸਕਰ (28) ਅਤੇ ਉਸ ਦੀ ਪਤਨੀ ਸਿੰਧੂਆ (26) ਨੂੰ ਗ੍ਰਿਫ਼ਤਾਰ ਕਰ ਲਿਆ, ਜਦਕਿ ਉਨ੍ਹਾਂ ਦੇ ਤਿੰਨ ਹੋਰ ਸਾਥੀ ਅਜੇ ਵੀ ਫ਼ਰਾਰ ਹਨ।