ਦਿੱਲੀ ਪੁਲੀਸ ਵੱਲੋਂ ‘ਸੁੱਲੀ ਡੀਲਸ’ ਐਪ ਬਣਾਉਣ ਵਾਲਾ ਮੱਧ ਪ੍ਰਦੇਸ਼ ਤੋਂ ਗ੍ਰਿਫ਼ਤਾਰ

ਨਵੀਂ ਦਿੱਲੀ/ਇੰਦੌਰ, 9 ਜਨਵਰੀ- ਦਿੱਲੀ ਪੁਲੀਸ ਨੇ ਮੱਧ ਪ੍ਰਦੇਸ਼ ਦੇ ਇੰਦੌਰ ਤੋਂ ਕਥਿਤ ਤੌਰ ’ਤੇ ‘ਸੁੱਲੀ ਡੀਲਸ’ ਐਪ ਬਣਾਉਣ ਵਾਲੇ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲੀਸ ਨੇ ਦੱਸਿਆ ਕਿ ਇਹ ‘ਸੁੱਲੀ ਡੀਲਸ’ ਐਪ ਮਾਮਲੇ ਵਿਚ ਪਹਿਲੀ ਗ੍ਰਿਫ਼ਤਾਰੀ ਹੈ। ਸੈਂਕੜੇ ਮੁਸਲਮਾਨ ਔਰਤਾਂ ਦੀਆਂ ਤਸਵੀਰਾਂ ਨੂੰ ਬਿਨਾ ਉਨ੍ਹਾਂ ਦੀ ਮਨਜ਼ੂਰੀ ਦੇ ਮੋਬਾਈਲ ਐਪਲੀਕੇਸ਼ਨ ’ਤੇ ‘ਨਿਲਾਮੀ’ ਲਈ ਪਾਇਆ ਗਿਆ ਸੀ। ਉਨ੍ਹਾਂ ਦੱਸਿਆ ਕਿ ਮੁਲਜ਼ਮ ਓਮਕਾਰੇਸ਼ਵਰ ਠਾਕੁਰ (26) ਨੇ ਇੰਦੌਰ ਸਥਿਤ ਆਈਪੀਐੱਸ ਅਕਾਦਮੀ ਤੋਂ ਬੀਸੀਏ ਕੀਤੀ ਹੈ ਅਤੇ ਉਹ ਨਿਊਯਾਰਕ ਸਿਟੀ ਟਾਊਨਸ਼ਿਪ ਦਾ ਵਸਨੀਕ ਹੈ। ਆਈਐੱਫਐੱਸਓ ਦੇ ਡੀਸੀਪੀ ਕੇਪੀਐੱਸ ਮਲਹੋਤਰਾ ਨੇ ਦੱਸਿਆ ਕਿ ਸ਼ੁਰੂਆਤੀ ਪੁੱਛਗਿਛ ਵਿਚ ਮੁਲਜ਼ਮ ਨੇ ਕਬੂਲਿਆ ਹੈ ਕਿ ਉਹ ਟਵਿੱਟਰ ’ਤੇ ਉਸ ਸਮੂਹ ਦਾ ਮੈਂਬਰ ਹੈ ਜਿਸ ਵਿਚ ਮੁਸਲਮਾਨ ਔਰਤਾਂ ਨੂੰ ਬਦਨਾਮ ਕਰਨ ਅਤੇ ਟਰੋਲ ਲਈ ਵਿਚਾਰ ਸਾਂਝੇ ਕੀਤੇ ਜਾਂਦੇ ਹਨ। ਅਧਿਕਾਰੀ ਨੇ ਦੱਸਿਆ, ‘‘ਉਸ ਨੇ ਗਿਟਹਬ ’ਤੇ ਕੋਡ ਵਿਕਸਤ ਕੀਤਾ। ਗਿਟਹਬ ਤੱਕ ਪਹੁੰਚ ਸਮੂਹ ਦੇ ਸਾਰੇ ਮੈਂਬਰਾਂ ਦੀ ਸੀ। ਮੁਸਲਮਾਨ ਔਰਤਾਂ ਦੀ ਤਸਵੀਰ ਨੂੰ ਸਮੂਹ ਦੇ ਮੈਂਬਰਾਂ ਨੇ ਅਪਲੋਡ ਕੀਤਾ ਸੀ। ਉੱਧਰ, ਇੰਦੌਰ ਪੁਲੀਸ ਦਾ ਕਹਿਣਾ ਹੈ ਕਿ ਦਿੱਲੀ ਪੁਲੀਸ ਨੇ ਕਥਿਤ ਤੌਰ ’ਤੇ ‘ਸੁੱਲੀ ਡੀਲਸ’ ਐਪ ਬਣਾਉਣ ਵਾਲੇ 26 ਸਾਲਾ ਵਿਅਕਤੀ ਦੀ ਗ੍ਰਿਫ਼ਤਾਰ ਬਾਰੇ ਜਾਣਕਾਰੀ ਉਸ ਨਾਲ ਸਾਂਝੀ ਨਹੀਂ ਕੀਤੀ ਹੈ। ਇੰਦੌਰ ਪੁਲੀਸ ਦੇ ਕਮਿਸ਼ਨਰ ਹਰੀਨਾਰਾਇਣਚਾਰੀ ਮਿਸ਼ਰਾ ਨੇ ਪੀਟੀਆਈ ਨੂੰ ਦੱਸਿਆ ਕਿ ਸੁੱਲੀ ਡੀਲਸ ਮਾਮਲੇ ਵਿਚ ਦਿੱਲੀ ਪੁਲੀਸ ਵੱਲੋਂ ਇੰਦੌਰ ਤੋਂ ਕੀਤੀ ਗਈ ਗ੍ਰਿਫ਼ਤਾਰੀ ਬਾਰੇ ਉਨ੍ਹਾਂ ਨੂੰ ਮੀਡੀਆ ਤੋਂ ਹੀ ਪਤਾ ਲੱਗਿਆ ਹੈ। ਇਸ ਬਾਰੇ ਦਿੱਲੀ ਪੁਲੀਸ ਨੇ ਹੁਣ ਤੱਕ ਉਨ੍ਹਾਂ ਨਾਲ ਕੋਈ ਅਧਿਕਾਰਤ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਹੈ। ਦਿੱਲੀ ਪੁਲੀਸ ਵੱਲੋਂ ਅਧਿਕਾਰਤ ਸੂਚਨਾ ਸਾਂਝੀ ਕੀਤੇ ਜਾਣ ਤੋਂ ਬਾਅਦ ਇੰਦੌਰ ਪੁਲੀਸ ਆਪਣੇ ਪੱਧਰ ’ਤੇ ਵੀ ਇਸ ਮਾਮਲੇ ਦੀ ਪੜਤਾਲ ਕਰਨ ’ਤੇ ਵਿਚਾਰ ਕਰੇਗੀ।