ਨਿਊਜ਼ੀਲੈਂਡ ‘ਚ ਗਲੀ ਦਾ ਨਾਂਅ ਰੱਖਿਆ ਗਿਆ ‘ਵਾਹਿਗੁਰੂ ਲੇਨ’

ਆਕਲੈਂਡ – ਆਕਲੈਂਡ ਦੇ ਸ਼ਹਿਰ ਮੈਨੂਕਾਓ ਨੇੜੇ ਇਕ ਗਲੀ ਦਾ ਨਾਂਅ ‘ਵਾਹਿਗੁਰੂ ਲੇਨ’ ਰੱਖਿਆ ਗਿਆ ਹੈ, ਜੋ ਕਿ ਪੰਜਾਬੀ ਭਾਈਚਾਰੇ ਲਈ ਮਾਣ ਵਾਲੀ ਗੱਲ ਹੈ। ਉਥੇ ਹੀ ਇਸ ਗਲੀ ਦਾ ਨਾਂਅ ਰਖਵਾਉਣ ਵਿਚ ਪਾਕਿਸਤਾਨੀ ਮੂਲ ਦੇ ਪੰਜਾਬੀ ਅਤੇ ਸਾਬਕਾ ਸੰਸਦ ਮੈਂਬਰ ਡਾ. ਅਸ਼ਰਫ ਚੌਧਰੀ, ਜੋ ਓਟਾਰਾ-ਪਾਪਾਟੋਏਟੋਏ ਦੇ ਲੋਕਲ ਬੋਰਡ ਦੇ ਮੈਂਬਰ ਹਨ, ਨੇ ਅਹਿਮ ਭੂਮਿਕਾ ਨਿਭਾਈ ਅਤੇ ਇਸ ਨਾਂਅ ਨੂੰ ਮਨਜ਼ੂਰੀ ਦਿਵਾਈ। ਲੋਕਲ ਬੋਰਡ ਵਿਚ ਡਾ. ਅਸ਼ਰਫ ਚੌਧਰੀ ਨੇ ਪਿਛਲੇ 2 ਕਾਰਜਕਾਲਾਂ ਦੌਰਾਨ ਪਾਪਾਟੋਏਟੋਏ ਵਿਚ ਨਵੀਆਂ ਗਲੀਆਂ/ਸੜਕਾਂ ਲਈ ਘੱਟੋ-ਘੱਟ ਅੱਧੀ ਦਰਜਨ ਭਾਰਤੀ ਮੂਲ ਦੇ ਨਾਵਾਂ ਨੂੰ ਮਨਜ਼ੂਰੀ ਦਿਵਾਉਣ ਵਿਚ ਅਹਿਮ ਭੂਮਿਕਾ ਨਿਭਾਈ ਹੈ। ਇਨ੍ਹਾਂ ਵਿਚ ਇਕ ਰੀਡਾਊਟ ਰੋਡ ਤੋਂ ਮੁੜਦੀ ਨਵੀਂ ਗਲੀ ਦੀ ਨਾਂਅ ‘ਵਾਹਿਗੁਰੂ ਲੇਨ’ ਰੱਖਿਆ ਗਿਆ ਹੈ।ਦੱਸ ਦੇਈਏ ਕਿ ਆਕਲੈਂਡ ਵਿਖੇ ਘਰ ਬਣਾਉਣ ਵਾਲੀ ਪੰਜਾਬੀਆਂ ਦੀ ਇਕ ਕੰਪਨੀ ‘ਸਨਸ਼ਾਈਨ ਹੋਮਜ਼ ਲਿਮਿਟਡ’ ਨੇ ਜਦੋਂ ਆਕਲੈਂਡ ਦੇ ਸ਼ਹਿਰ ਮੈਨੂਕਾਓ ਨੇੜੇ ਰੀਡਾਊਟ ਰੋਡ ‘ਤੇ 3 ਵੱਡੇ ਪਲਾਟ ਲੈ ਕੇ 19 ਨਵੇਂ ਘਰ ਬਣਾਉਣੇ ਸੀ ਤਾਂ ਉਨ੍ਹਾਂ ਉਥੇ ਬਣਨ ਵਾਲੀ ਨਵੀਂ ਗਲੀ ਦਾ ਨਾਂਅ ਰੱਖਣ ਲਈ 3 ਨਾਂਅ ਪੇਸ਼ ਕੀਤੇ ਸਨ, ਜਿਹੜੇ ਕਿਤੇ ਨਾ ਕਿਤੇ ਵਾਹਿਗੁਰੂ ਦੀ ਯਾਦ ਦਿਵਾਉਂਦੇ ਸਨ। ਨਵੰਬਰ 2021 ਵਿਚ ਨਾਂਅ ਰੱਖਣ ਵਾਲੀ ਕੌਂਸਲ ਨਾਲ ਗੱਲ ਚੱਲੀ ਸੀ। ਦੱਸ ਦੇਈਏ ਕਿ ਨਵੀਂਆਂ ਗਲੀਆਂ ਅਤੇ ਬਣ ਰਹੀਆਂ ਸੜਕਾਂ ਨੂੰ ਨਾਂਅ ਦੇਣ ਦਾ ਅਧਿਕਾਰ ਸਥਾਨਕ ਕੌਂਸਲ ਕੋਲ ਹੁੰਦਾ ਹੈ ਅਤੇ ਸਥਾਨਕ ਲੋਕਲ ਬੋਰਡ ਮੁੱਖ ਭੂਮਿਕਾ ਨਿਭਾਉਂਦੇ ਹਨ। ਆਕਲੈਂਡ ਵਿਚ 21 ਲੋਕਲ ਬੋਰਡ ਹਨ ਅਤੇ ਉਨ੍ਹਾਂ ਨੂੰ ਅਜਿਹੀਆਂ ਨਵੀਆਂ ਸੜਕਾਂ ਅਤੇ ਗਲੀ ਦੇ ਨਾਮ ਨੂੰ ਮਨਜ਼ੂਰੀ ਦੇਣ ਦਾ ਅੰਤਿਮ ਅਧਿਕਾਰ ਦਿੱਤਾ ਗਿਆ ਹੈ।