ਪਤਨੀ ਬਾਰੇ ਟਿੱਪਣੀ ਕਰਨ ’ਤੇ ਰਾਜਾ ਵੜਿੰਗ ਉਤੇ ਵਿਰੋਧੀਆਂ ਨੇ ਸਵਾਲ ਚੁੱਕੇ

ਗਿੱਦੜਬਾਹਾ (ਮੁਕਤਸਰ), 7 ਨਵੰਬਰ : ਗਿੱਦੜਬਾਹਾ ਵਿਧਾਨ ਸਭਾ ਜ਼ਿਮਨੀ ਚੋਣ ਲਈ ਮੁਹਿੰਮ ਤੇਜ਼ ਹੋਣ ਦੇ ਨਾਲ ਹੀ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਇਕ ਕਥਿਤ ਟਿੱਪਣੀ ਦੀ ਵਾਇਰਲ ਵੀਡੀਓ ਨੇ ਵਿਰੋਧੀ ਧਿਰ ਨੂੰ ਪਾਰਟੀ ਨੂੰ ਨਿਸ਼ਾਨਾ ਬਣਾਉਣ ਲਈ ਹਥਿਆਰ ਬਣਾ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਗਿੱਦੜਬਾਹਾ ਵਿੱਚ ਹਾਲ ਹੀ ਵਿੱਚ ਇੱਕ ਜਨਤਕ ਰੈਲੀ ਵਿੱਚ ਰਾਜਾ ਵੜਿੰਗ ਵੱਲੋਂ ਸੰਬੋਧਨ ਦੌਰਾਨ ਇਕ ਟਿੱਪਣੀ ਕਾਰਨ ਵਿਵਾਦ ਸ਼ੁਰੂ ਹੋਇਆ ਹੈ। ਵੀਡੀਓ ਵਿਚ ਰਾਜਾ ਵੜਿੰਗ ਕਹਿੰਦੇ ਸੁਣਾਈ ਦਿੰਦੇ ਹਨ ਕਿ ਮੇਰੀ ਪਤਨੀ ਸਵੇਰੇ 6 ਵਜੇ ਤਿਆਰ ਹੋਣ ਤੋਂ ਬਾਅਦ (ਆਪਣੀ ਚੋਣ ਮੁਹਿੰਮ ਲਈ) ਰੋਜ਼ਾਨਾ ਮੈਦਾਨ ਵਿਚ ਉਤਰਦੀ ਹੈ ਅਤੇ 11 ਵਜੇ ਵਾਪਸ ਆਉਂਦੀ ਹੈ…। ਉਹ ਹੁਣ ਮੇਰੇ ਤੋਂ ਦੂਰ ਹੈ…. ਕਿਰਪਾ ਕਰਕੇ ਮੇਰੇ ਲਈ ਇੱਕ ਰਸੋਈਏ ਦਾ ਪ੍ਰਬੰਧ ਕਰੋ ਜੋ ਭੋਜਨ ਤਿਆਰ ਕਰ ਸਕੇ। ਕੁਝ ਦਿਨਾਂ ਬਾਅਦ (ਇੱਕ ਵਾਰ ਵਿਧਾਨ ਸਭਾ ਉਪ ਚੋਣ ਨਤੀਜੇ ਆਉਣ ਤੋਂ ਬਾਅਦ) ਉਹ ਹੋਰ ਕੰਮਾਂ ਵਿੱਚ ਰੁੱਝ ਜਾਵੇਗੀ। ਮੈਂ ਉਸ ਨੂੰ ਦੋ ਮਿੰਟ ਲਈ ਵੀ ਨਹੀਂ ਮਿਲਾਂਗਾ।