ਯਮਨ ਦੇ ਅਦਨ ਸ਼ਹਿਰ 'ਚ ਫਸੇ ਹੋਏ 350 ਭਾਰਤੀਆਂ ਨੂੰ ਸੁਰੱਖਿਅਤ ਕੱਢਿਆ

ਨਵੀਂ ਦਿੱਲੀ, 1 ਅਪ੍ਰੈਲ : ਯਮਨ ਦੇ ਅਦਨ ਸ਼ਹਿਰ ਵਿਚੋਂ 350 ਦੇ ਕਰੀਬ ਭਾਰਤੀਆਂ ਨੂੰ ਸੁਰੱਖਿਅਤ ਕੱਢ ਲਿਆ ਗਿਆ ਹੈ ਅਤੇ ਇਹ ਜਹਾਜ਼ ਇਨਾਂ ਲੋਕਾਂ ਨੂੰ ਯਮਨ ਦੇ ਗੁਆਂਢੀ ਦੇਸ਼ ਜਿਬੂਤੀ ਲੈ ਕੇ ਜਾਵੇਗਾ। ਯਮਨ ਵਿਚ ਵਧਦੀ ਹਿੰਸਾ ਵਿਚਾਲੇ ਅੱਧੀ ਰਾਤ ਨੂੰ ਇਸ ਮੁਹਿੰਮ ਨੂੰ ਅੰਜਾਮ ਦਿੱਤਾ ਹੈ। ਰੱਖਿਆ ਮੰਤਰਾਲੇ ਦੇ ਸੂਤਰਾਂ ਨੇ ਦੱਸਿਆ ਕਿ ਆਈ ਐਨ ਐਸ ਸੁਮਿਤਰਾ ਅਦਨ ਤੱਟ ਤੋਂ ਨਿਕਲ ਚੁੱਕਾ ਹੈ ਅਤੇ ਇਸ ਉੱਤੇ ਕਰੀਬ 350 ਭਾਰਤੀ ਸਵਾਰ ਹਨ। ਇਸ ਤੋਂ ਪਹਿਲਾਂ ਭਾਰਤ ਨੂੰ ਮੰਗਲਵਾਰ ਰਾਤ ਨੂੰ ਅਦਨ ਤੋਂ ਕਰੀਬ 400 ਭਾਰਤੀਆਂ ਨੂੰ ਕੱਢਣ ਲਈ ਅਦਨ ਤੱਟ ਉੱਤੇ ਆਪਣਾ ਜਹਾਜ਼ ਖੜਾ ਕਰਨ ਦੀ ਮਨਜ਼ੂਰੀ ਮਿਲ ਗਈ ਸੀ। ਸਰਕਾਰ ਨੇ ਹਿੰਸਾਗ੍ਰਸਤ ਯਮਨ ਵਿਚ ਫਸੇ 4,000 ਤੋਂ ਵੱਧ ਭਾਰਤੀਆਂ ਨੂੰ ਕੱਡਣ ਲਈ ਵੱਡੀ ਹਵਾਈ ਅਤੇ ਸਮੁੰਦਰੀ ਮੁਹਿੰਮ ਛੇੜੀ ਹੈ। ਉੱਧਰ ਭਾਰਤੀ ਹਵਾਈ ਫੌਜ ਨੇ ਦੋ ਹਵਾਈ ਜਹਾਜ਼ਾਂ ਨੂੰ ਕਿਸੇ ਵੀ ਸਥਿਤੀ ਨਾਲ ਨਜਿੱਠਣ ਲਈ ਤਿਆਰ ਰੱਖਿਆ ਹੈ। ਏਅਰ ਇੰਡੀਆ ਨੇ ਯਮਨ ਦੀ ਰਾਜਧਾਨੀ ਸਨਾ ਤੋਂ ਭਾਰਤੀਆਂ ਨੂੰ ਜਿਬੂਰਤੀ ਪਹੁੰਚਾਉਣ ਲਈ ਮਸਕਟ ਵਿਚ 180 ਸੀਟਾਂ ਵਾਲੇ ਦੋ ਏਅਰਬੱਸ ਏ-320 ਜਹਾਜ਼ਾਂ ਨੂੰ ਤਿਆਰ ਰੱਖਿਆ ਹੈ। ਸਬੰਧਤ ਅਧਿਕਾਰੀਆਂ ਨੂੰ ਮਨਜ਼ੂਰੀ ਮਿਲਣ ਤੋਂ ਬਾਅਦ ਹੀ ਇਸ ਦਿਸ਼ਾ ਵਿਚ ਕਦਮ ਉਠਾਇਆ ਜਾਵੇਗਾ।