‘ਸੰਘ ਪਰਿਵਾਰ ਦੇ ਗੁੰਡਿਆਂ’ ਨੇ ਮੇਰੇ ਭਰਾ ’ਤੇ ਹਮਲਾ ਕੀਤਾ: ਹਿਜਾਬ ਮਾਮਲੇ ਦੀ ਪਟੀਸ਼ਨਰ ਦਾ ਦੋਸ਼

ਉਡੁਪੀ (ਕਰਨਾਟਕ), 22 ਫਰਵਰੀ-ਹਿਜਾਬ ਵਿਵਾਦ ਕਾਰਨ ਕਰਨਾਟਕ ਹਾਈ ਕੋਰਟ ਵਿੱਚ ਪਟੀਸ਼ਨ ਦਾਇਰ ਕਰਨ ਵਾਲੀਆਂ ਕੁੜੀਆਂ ਵਿੱਚੋਂ ਇੱਕ ਹਾਜ਼ਰਾ ਸ਼ਿਫਾ ਨੇ ਦੋਸ਼ ਲਾਇਆ ਹੈ ਕਿ ਕਥਿਤ ‘ਸੰਘ ਪਰਿਵਾਰ ਦੇ ਗੁੰਡਿਆਂ’ ਨੇ ਸੋਮਵਾਰ ਰਾਤ ਉਡੁਪੀ ਵਿੱਚ ਉਸ ਦੇ ਭਰਾ ’ਤੇ ਹਮਲਾ ਕਰਕੇ ਉਨ੍ਹਾਂ ਦੀ ਸੰਪਤੀ ਦਾ ਨੁਕਸਾਨ ਕੀਤਾ। ਕਈ ਟਵੀਟਸ ‘ਚ ਸ਼ਿਫਾ ਨੇ ਹਮਲਾਵਰਾਂ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ। ਉਸ ਨੇ ਲਿਖਿਆ, ‘ਭੀੜ ਨੇ ਮੇਰੇ ਭਰਾ ‘ਤੇ ਬੇਰਹਿਮੀ ਨਾਲ ਹਮਲਾ ਕੀਤਾ। ਸਿਰਫ਼ ਇਸ ਲਈ ਕਿ ਮੈਂ ਆਪਣੇ ਹਿਜਾਬ ਲਈ ਲੜ ਰਹੀ ਹਾਂ, ਜੋ ਮੇਰਾ ਹੱਕ ਹੈ। ਸਾਡੀ ਜਾਇਦਾਦ ਵੀ ਤਬਾਹ ਹੋ ਗਈ। ਕਿਉਂ? ਕੀ ਮੈਂ ਆਪਣਾ ਹੱਕ ਨਹੀਂ ਮੰਗ ਸਕਦੀ? ਉਸ ਦਾ ਅਗਲਾ ਨਿਸ਼ਾਨਾ ਕੌਣ ਹੋਵੇਗਾ? ਮੈਂ ਸੰਘ ਪਰਿਵਾਰ ਦੇ ਗੁੰਡਿਆਂ ਖ਼ਿਲਾਫ਼ ਕਾਰਵਾਈ ਦੀ ਮੰਗ ਕਰਦੀ ਹਾਂ।’ ਸ਼ਿਫਾ ਮੁਤਾਬਕ ਉਸ ਦਾ 20 ਸਾਲਾ ਭਰਾ ਸੈਫ਼ ਉਡੁਪੀ ਦੇ ਹਾਈ-ਟੈੱਕ ਹਸਪਤਾਲ ‘ਚ ਭਰਤੀ ਹੈ। ਸ਼ਿਫਾ ਦੇ ਜਾਣਕਾਰ ਮਸੂਦ ਮੰਨਾ ਨੇ ਟਵੀਟ ਵਿੱਚ ਦਾਅਵਾ ਕੀਤਾ ਕਿ 150 ਲੋਕਾਂ ਦੀ ਭੀੜ ਨੇ ਸੈਫ਼ ‘ਤੇ ਹਮਲਾ ਕੀਤਾ।