ਜੰਮੂ ’ਚ ਸੁਰੱਖਿਆ ਬਲਾਂ ਨਾਲ ਮੁਕਾਬਲੇ ਦੌਰਾਨ 4 ਅਤਿਵਾਦੀ ਹਲਾਕ

ਜੰਮੂ, 28 ਦਸੰਬਰ- ਅੱਜ ਤੜਕੇ ਜੰਮੂ ਦੇ ਸਿਧਰਾ ਇਲਾਕੇ ‘ਚ ਸੁਰੱਖਿਆ ਬਲਾਂ ਅਤੇ ਅਤਿਵਾਦੀਆਂ ਵਿਚਾਲੇ ਹੋਏ ਮੁਕਾਬਲੇ ‘ਚ 4 ਅਤਿਵਾਦੀ ਮਾਰੇ ਗਏ। ਇਹ ਮੁਕਾਬਲਾ ਜੰਮੂ-ਸ੍ਰੀਨਗਰ ਰਾਸ਼ਟਰੀ ਰਾਜਮਾਰਗ ’ਤੇ ਸਿਧਰਾ ਬਾਈਪਾਸ ਖੇਤਰ ਦੇ ਤਵੀ ਪੁਲ ਨੇੜੇ ਸੰਘਣੀ ਧੁੰਦ ਵਿੱਚ ਸਵੇਰੇ 7.30 ਵਜੇ ਸ਼ੁਰੂ ਹੋਇਆ। ਅਤਿਵਾਦੀਆਂ ਨੂੰ ਬੇਅਸਰ ਕਰਨ ਲਈ ਖੇਤਰ ਵਿੱਚ ਵਾਧੂ ਫੋਰਸ ਭੇਜੀ ਗਈ ਸੀ। ਅਤਿਵਾਦੀਆਂ ਨੂੰ ਤਵੀ ਪੁਲ ਨੇੜੇ ਉਦੋਂ ਰੋਕਿਆ ਗਿਆ, ਜਦੋਂ ਉਹ ਟਰੱਕ ਵਿੱਚ ਕਸ਼ਮੀਰ ਜਾ ਰਹੇ ਸਨ। ਅਤਿਵਾਦੀਆਂ ਦੀਆਂ ਲਾਸ਼ਾਂ ਕੋਲੋਂ ਸੱਤ ਏਕੇ-47 ਰਾਈਫਲਾਂ, ਐੱਮ4 ਰਾਈਫਲ, 3 ਪਿਸਤੌਲਾਂ ਸਮੇਤ ਹੋਰ ਅਸਲਾ ਬਰਾਮਦ ਕੀਤਾ ਗਿਆ ਹੈ।