ਚੰਨ ’ਤੇ ਜਾ ਰਹੇ ਦੇਸ਼ ਦੀ ਜ਼ਮੀਨੀ ਹਕੀਕਤ: ਉੜੀਸਾ ’ਚ ਨਾਬਾਲਗ ਧੀ ਜ਼ਖ਼ਮੀ ਪਿਤਾ ਨੂੰ 35 ਕਿਲੋਮੀਟਰ ਤੱਕ ਰੇਹੜੀ ’ਤੇ ਖਿੱਚ ਕੇ ਹਸਪਤਾਲ ਪੁੱਜੀ

ਭਦਰਕ, 27 ਅਕਤੂਬਰ- ਉੜੀਸਾ ਦੇ ਭਦਰਕ ਜ਼ਿਲ੍ਹੇ ਵਿੱਚ 14 ਸਾਲਾ ਲੜਕੀ ਨੇ ਆਪਣੇ ਜ਼ਖ਼ਮੀ ਪਿਤਾ ਨੂੰ ਜ਼ਿਲ੍ਹਾ ਹੈੱਡਕੁਆਰਟਰ ਹਸਪਤਾਲ (ਡੀਐੱਚਐੱਚ) ਲਿਜਾਣ ਲਈ 35 ਕਿਲੋਮੀਟਰ ਦੀ ਦੂਰੀ ਤੱਕ ਰਿਕਸ਼ਾ ਰੇਹੜੀ ਨੂੰ ਖਿੱਚਿਆ। 23 ਅਕਤੂਬਰ ਦੀ ਘਟਨਾ ਦਾ ਖੁਲਾਸਾ ਉਦੋਂ ਹੋਇਆ, ਜਦੋਂ ਕੁਝ ਸਥਾਨਕ ਲੋਕਾਂ ਅਤੇ ਪੱਤਰਕਾਰਾਂ ਨੇ ਭਦਰਕ ਸ਼ਹਿਰ ਦੇ ਮੋਹਤਾਬ ਚੱਕ ਨੇੜੇ ਲੜਕੀ ਨੂੰ ਆਪਣੇ ਪਿਤਾ ਨੂੰ ਰੇਹੜੀ ‘ਤੇ ਘਰ ਲਿਜਾਂਦਿਆਂ ਦੇਖਿਆ। ਪਿੰਡ ਨਦੀਗਨ ਦੀ ਸੁਜਾਤਾ ਸੇਠੀ (14) ਆਪਣੇ ਜ਼ਖਮੀ ਪਿਤਾ ਨੂੰ ਰਿਕਸ਼ਾ ਰੇਹੜੀ ਮਦਦ ਨਾਲ ਪਿੰਡ ਤੋਂ ਕਰੀਬ 14 ਕਿਲੋਮੀਟਰ ਦੂਰ ਧਾਮਨਗਰ ਹਸਪਤਾਲ ਲੈ ਗਈ। ਡਾਕਟਰਾਂ ਨੇ ਉਸ ਨੂੰ ਆਪਣੇ ਪਿਤਾ ਨੂੰ ਭਦਰਕ ਡੀਐੱਚਐੱਚ ਵਿੱਚ ਲੈ ਕੇ ਜਾਣ ਲਈ ਕਿਹਾ। ਇਸ ਤੋਂ ਬਾਅਦ ਸੁਜਾਤਾ ਨੇ ਆਪਣੇ ਪਿਤਾ ਨੂੰ ਜ਼ਿਲ੍ਹਾ ਹਸਪਤਾਲ ਪਹੁੰਚਾਉਣ ਲਈ 35 ਕਿਲੋਮੀਟਰ ਤੱਕ ਰੇਹੜੀ ਖਿੱਚ ਕੇ ਲੈ ਕੇ ਗਈ। ਉਸ ਦੇ ਪਿਤਾ ਸ਼ੰਭੂਨਾਥ 22 ਅਕਤੂਬਰ ਨੂੰ ਝਗੜੇ ਵਿਚ ਜ਼ਖਮੀ ਹੋ ਗਏ ਸਨ। ਸੁਜਾਤਾ ਨੇ ਦੱਸਿਆ ਕਿ ਭਦਰਕ ਡੀਐੱਚਐੱਚ ਦੇ ਡਾਕਟਰਾਂ ਨੇ ਉਸ ਨੂੰ ਘਰ ਵਾਪਸ ਜਾਣ ਅਤੇ ਅਪਰੇਸ਼ਨ ਲਈ ਹਫ਼ਤੇ ਬਾਅਦ ਆਉਣ ਦੀ ਸਲਾਹ ਦਿੱਤੀ। ਉਸ ਨੇ ਕਿਹਾ,‘ਮੇਰੇ ਕੋਲ ਨਾ ਤਾਂ ਪ੍ਰਾਈਵੇਟ ਗੱਡੀ ਕਿਰਾਏ ‘ਤੇ ਲੈਣ ਲਈ ਪੈਸੇ ਹਨ ਅਤੇ ਨਾ ਹੀ ਐਂਬੂਲੈਂਸ ਨੂੰ ਬੁਲਾਉਣ ਲਈ ਕੋਈ ਮੋਬਾਈਲ ਫ਼ੋਨ ਹੈ। ਇਸ ਲਈ ਮੈਂ ਆਪਣੇ ਪਿਤਾ ਦੀ ਆਪਣੀ ਰੇਹੜੀ ’ਤੇ ਹਸਪਤਾਲ ਪਹੁੰਚਾਇਆ।’