ਮੋਦੀ ਨੂੰ ਵੋਟਿੰਗ ਵਧਾਉਣ ਲਈ 2.1 ਕਰੋੜ ਡਾਲਰ ਭੇਜੇ ਗਏ: ਟਰੰਪ

ਵਾਸ਼ਿੰਗਟਨ- ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਹਾਲ ਹੀ ਦੇ ਦਿਨਾਂ ’ਚ ਚੌਥੀ ਵਾਰ ਦਾਅਵਾ ਕੀਤਾ ਹੈ ਕਿ ਬਾਇਡਨ ਪ੍ਰਸ਼ਾਸਨ ਨੇ ‘ਵੋਟਿੰਗ ਵਧਾਉਣ’ ਲਈ ਭਾਰਤ ਨੂੰ 2.1 ਕਰੋੜ ਡਾਲਰ ਦੇ ਫੰਡ ਅਲਾਟ ਕੀਤੇ ਸਨ।ਵਾਸ਼ਿੰਗਟਨ ’ਚ ‘ਗਵਰਨਰਜ਼ ਵਰਕਿੰਗ ਸੈਸ਼ਨ’ ਨੂੰ ਸੰਬੋਧਨ ਕਰਦਿਆਂ ਟਰੰਪ ਨੇ ਕਿਹਾ, ‘ਭਾਰਤ ’ਚ ਵੋਟਿੰਗ ਵਧਾਉਣ ਲਈ 2.1 ਕਰੋੜ ਡਾਲਰ ਮੇਰੇ ਮਿੱਤਰ ਮੋਦੀ ਨੂੰ ਜਾ ਰਹੇ ਹਨ। ਅਸੀਂ ਭਾਰਤ ’ਚ ਵੋਟਿੰਗ ਵਧਾਉਣ ਲਈ 2.1 ਕਰੋੜ ਡਾਲਰ ਦੇ ਰਹੇ ਹਾਂ। ਸਾਡੇ ਬਾਰੇ ਕੀ ਹੈ? ਮੈਂ ਵੀ ਵੋਟਿੰਗ ਵਧਾਉਣਾ ਚਾਹੁੰਦਾ ਹਾਂ।’ ਇਸ ਪ੍ਰੋਗਰਾਮ ਦੀ ਇੱਕ ਵੀਡੀਓ ਕਲਿੱਪ ਬੀਤੇ ਦਿਨ ਵ੍ਹਾਈਟ ਹਾਊਸ ਵੱਲੋਂ ਸੋਸ਼ਲ ਮੀਡੀਆ ’ਤੇ ਪੋਸਟ ਕੀਤੀ ਗਈ। ਟਰੰਪ ਨੇ ਇਹ ਵੀ ਕਿਹਾ ਕਿ ਬੰਗਲਾਦੇਸ਼ ’ਚ ਸਿਆਸੀ ਸਥਿਤੀ ਮਜ਼ਬੂਤ ਕਰਨ ਲਈ ਉਸ ਕੰਪਨੀ ਨੂੰ ਫੰਡ ਦਿੱਤੇ ਗਏ ਜਿਸ ਬਾਰੇ ਕਿਸੇ ਨੇ ਕਦੀ ਨਹੀਂ ਸੁਣਿਆ। ਉਨ੍ਹਾਂ ਕਿਹਾ, ‘2.9 ਕਰੋੜ ਅਮਰੀਕੀ ਡਾਲਰ ਮਿਲੇ। ਉਨ੍ਹਾਂ ਨੂੰ ਇੱਕ ਚੈੱਕ ਮਿਲਿਆ। ਤੁਸੀਂ ਸੋਚ ਸਕਦੇ ਹੋ? ਤੁਸੀਂ ਇੱਕ ਛੋਟੀ ਜਿਹੀ ਫਰਮ ਹੋ। ਤੁਹਾਨੂੰ ਇੱਥੋਂ 10 ਹਜ਼ਾਰ ਮਿਲੇ ਹਨ, ਉੱਥੋਂ 10 ਹਜ਼ਾਰ ਮਿਲਦੇ ਹਨ ਅਤੇ ਫਿਰ ਅਮਰੀਕੀ ਸਰਕਾਰ ਤੋਂ 2.9 ਕਰੋੜ ਡਾਲਰ ਮਿਲਦੇ ਹਨ।’